口水怪魔

可以專心做好一件事, 已經是一種幸福

真窮易過,假富難捱

http://hk.apple.nextmedia.com/enews/realtime/20170405/56522347

大劉對長子劉鳴煒評分很高,但對於外間批評兒子離地,大劉不認同,反而覺得現在年輕人才離地:「你可以話依家啲年輕人俾人縱壞咗未捱過苦,亦可以話,最重要一樣嘢係,佢哋唔係掂地,而係離地。佢唔知道個個人有今日嘅成功,個個都係咁樣捱出嚟㗎啦!」冇錯,呢集,大劉鬧廢青。回少少帶,劉鳴煒兩年前曾指年輕人愛去旅行、買手機又追求最新型號,如果肯犧牲一下,「去少啲旅行儲首期」,言論一出被批離地,但大劉撐兒子沒有講錯,外界不接受是因為「唔啱聽」。【「爭人周身債破產咪啱聽囉!」】
問大劉:「劉鳴煒俾人話離地,你覺得呢種批評啱唔啱?」大劉劈頭便說:「梗係唔啱啦!唔係因為佢係我個仔。佢嘅出發點係好嘅,啲人點會受落啫?啲人最鍾意聽你使咗幾多錢呀碌咗幾多卡數呀爭人周身債然後申請破產咪啱聽囉!我諗今日,香港最有錢嘅頭一二十人,如果係自己創業嘅,個個都係慳番嚟自己捱番嚟,唔係話有錢就去旅行冇錢就去碌卡。但依家啲人,你叫佢唔好去旅行?仲慘過殺佢老竇老母。」「我上次已經叫佢(劉鳴煒)唔好多多聲氣。其實佢講得好啱㗎,但啲人點會啱聽啫?啲人係鍾意聽啲啱聽嘅說話,但係對佢冇益處。」「點解有啲人注定冇得上位冇得成功吖?因為佢思想上已經係錯咗。但絕大部份都係呢啲人。正如股市,贏錢嘅人只佔好少數。」【住劏房的「廢青」】
「有一次我喺電視見到,我都好傷感。我見到一個青年,25、6歲左右,好新潮,男仔,高高大大好大隻嘅,戴女人耳環,接受訪問話住劏房,地方好細。接受訪問嗰陣,佢拎住本漫畫,咁我心諗,如果你講到你間劏房咁細,你係咪應該去兼職?揸番一更的士又好巴士又好,或者搵番份工。但佢唔係,佢匿喺房裡面睇漫畫。咁呢啲,你有乜嘢可以怪人?」「你知唔知我去過幾多次中東同非洲?全部徒勞無功。坐四人的士,黑人又大隻又高,連埋我,都唔係細,四人的士坐五個人,坐白牌,一程車四個半鐘頭來回九個鐘,一單生意都做唔到。真係有淚水標出嚟。」三句唔埋,大劉再說:「今日啲年輕人,淨係識怨天尤人,你打開電視,係好恐怖。最多嘅廣告你估係乜嘢?旅行社、財務公司廣告,鼓勵你去借錢碌卡去旅行囉,咁邊個唔知歎係好吖?咁你使唔使孭債吖?你係咪想好似希臘咁,爭人錢發難渣唔還吖?」【「真窮易過,假富難捱!」】
「根本好多嘢都係自己攞嚟,你一定要靠自己。你靠自己唔係一定會搵到錢,但你唔肯勤力唔肯發奮,你一定冇得發㗎喎!真窮易過,假富難捱!做人千祈咪充!」
「所以依家啲年輕人,唉,有新機又要換有呢樣又要換,完全同我哋以前想法係唔同。」
「我哋以前嘅居住環境曳到,老鼠通屋走,咁你點呀?依家有劏房,乾乾淨淨有冷氣咪好囉!」
「睇番以前初初,我記得我同我前妻(寶詠琴)個理想,層樓千五呎,有一百萬定期存款,我已經好滿意。當時。唔係我一開始就諗要有錢要有幾錢,邊有得咁樣諗?你估傻嘅咩?」【大劉的致富心得】
如題。大劉稱:「第一,一定要勤力啦;第二,信用好緊要,呢個係我由我媽媽嗰度學番嚟。」做生意要夠狠?大劉卻說:「狠,我唔承認囉!好有膽量我認嘅。其實我好心軟。好多嘢人哋對我唔住嘅,我都好易算,因為我好滿足,老天爺成日都照顧住我,我已經好開心。」心軟,就易受傷。大劉說:「一定會,做生意又有,男女朋友之間又有,一定會有。」

8May17

,

Comments are currently closed.